உறவுகள் எத்தனையோ எனக்குண்டு
பரிவோடு அத்தனையும் சொல்கின்றேன்கேள்
அண்ணன்மார் தம்பிமார் அக்காதங்கைகளும்
அண்ணிகளாம் அவள்தந்த சொந்தங்களாம்
மாமனெம்பார் மாப்பிள்ளையென்பார் அன்பான
மாமியென்பார் மைத்துனியென்பார் சகலையென்பார்
அவனோர் அம்மான் சிறிசானாலும்
இவனென் மருமான் புள்ளிமான்போல
நாணத்துடன் நிற்பவள் என் முறைமான்
தேனொழுக அத்தான் எனவழைப்பாள்
சும்மாவே இருக்கும் இவரெனக்கு
அம்மாஞ்சி என்றே பெயருண்டு
பெரியப்பா பெரியம்மா பெரியக்கா
பெரியண்ணா பெரியத்தை என்றே
பெருங்கூட்டப் பெரிசுகள் எனக்குண்டு
அன்பான அம்மாவழி சித்திகளும்
பண்பான அப்பாவழி சித்தப்பன்களும்
இவரல்லாமல் சித்தியார் பெற்றபெண்ணும்
இவளோடு உதித்த தம்பிமாருமுண்டு
உதிரத்தால் வந்தசொந்தங்கள் இவரென்றால்
மதிகொண்ட மனைவியால் எனைச்சேர்ந்த
பந்தங்கள் பலவகையாய் பலபேருண்டு
சொந்தங்கள் எங்கெங்கும் கணக்கிலாமல்
எத்தனையோ இருந்தாலுமென் நாவினிலே
அத்தனை பெயர்களையும் ஒருபோதும்
மறவாமல் பெயர்சொல்லி அழைக்காமல்
உறவின் பெயர் சொல்லியழைப்பேனடா

"இத்தனை உறவுகளை" என்மகனே
அத்தனையும் என்பாட்டன் என்னப்பனுக்கு
சொன்னதை மறக்காமல் எனக்கும்தான்
என்னப்பன் அப்படியே சொன்னாலும்
இத்தனை உறவுகள் என்னப்பனுக்கில்லையடா
அத்தனை சொந்தங்கள் இல்லைதான்
ஏதோ பேருக்குசில பேர்களென்றே
தோதான சிலசொந்தம் என்னப்பன்
எனக்களித்த அன்பான கூட்டம்போல்
என்மகன் உனக்காக என்மூலம்
வரவில்லை என்றாலும் மகனே
வரம்போல அம்மாவும் அப்பாவும்
யாமிருக்க பாட்டனும் பாட்டியும்
யாமுனக்கு தந்தோம் ஆனாலும்
வரும்காலம் உறவுகள் என்றேதுமில்லையென
இருக்கின்ற விஞ்ஞானம் முழங்குதடா
பிறக்கும் குழந்தையின் சுவடுகளேயில்லாமல்
கருப்பைக்குள் வைத்திடாமல் காப்பாற்ற
சோதனைக்குழாயாம் பரிணாமப் பிறப்புகளாம்
வேதனையாய் இருக்குதடா கேட்பதற்கு
தாயும் தந்தையும் பேருக்கென உண்டாம்
சேயொன்று பெற்றிடுவாராம் சிரமமில்லாமலே
நான் இன்றுனக்கு ஒன்றுரைப்பேன்கேள்
நானுனக்கு என்பாட்டன் எடுத்துரைத்த
உறவுகள் பெயர்யாவும் சீரியகல்கொண்டு
மறக்காமல் உளியெடுத்து செதுக்கி
இவையாவும் வருங்காலம் தெரியவே
சுவையாக எழுதிவை என் மகனே!
உறவுகளெல்லாம் காலத்தின் கொடுமைக்கு
சிறகொடிந்த பறவையாய் சீரழிந்தகதையை
நாளைய மனிதனெனும் ஓர்பிறவி
மூளைகொண்டு படித்தாலும் படிக்கலாம்
அடடா இப்படியெல்லாம் உறவுப்பெயர்கள்
கூட்டாக ஒருகாலத்தில் இருந்தனவாம்
ஒன்றேயொன்றான எமக்கிது புதுசெய்தி
என்றெலாம் பலசொல்லி வியக்கலாம்.